Thawngpang Bultan(April 4)

A Sual Lo Buin Thih-dan Pek An Timh Mi US Pa A Luat Than: US ram Alabama state ah restaurant manager pa 2 a thah hna tiah sual an rak puh i a rak al chih len hna nain thih-dan an pek ding bia an rak chah piak cang mi pa Anthony Ray Hinton cu kum 30 leng thawng inn a um hnu in biaceih zung nih a sual lo an ti than caah kan hnu ninga ni ah khan an thlah than cang. 

Mr. Hinton hi mithattu a si lo timi an hmuh than nak cu a thimi pahnih a khen tu meithal kuan hi Mr. Hinton a meithal ah hman khawh phunn a si lo timi theihfiannak an hmuh than kho caah a si. Thihdan pek ding kum 28 chung a hngaknak ah a hringtu nu nih a thih tak, a fa le zong an rak thang cang, amah zong a sam par dih ve cang. 

'Hiti ka sual lo buin thih ding a ka kuat tu cu Pathian tu nih bia an ceih te ko hna lai' tiah Mr. Hinton nih a ti hna. BBC,The Guardian 

Obama Nih Republican Pawl A Lemsoi Hna: Democratic hruainak in Iran nuclear dial hnatlaknak an ngah mi cu Republican zong nih hnatlak pi ve ding in Obama nih Republican hruaitu tampi a chonh biak cang hna tiah The Guardian nih a thanh.

A tu an ngah mi Iran nuclear dial hi Republican cheukhat nih cun an lung tling ve lo. Upadi a fehter tu cu Congress an si, Congress cu Republican nih an control cang tikah Obama nih a mah duh mi thil poah a tuah kho lo. Mah hnatlaknak zong hi Congress nih an hnon ah cun fehter khawh a si lai lo, Obama nih a veto dah a hman rih ti dah lo cun. 

Tutan hnatlaknak an ngah mi Iran nuclear dial hi Obama telh in Democrats tampi le Iran lei zong nih teinak ngan ngai ah an ruah mi a si. 

Arsenal Le Man U Nih Man City 'Bye Bye' An Ti Cang: England ram Premier League cu tuni ah Lai mino nih kan tanhpi ngai veve mi Arsenal le Liverpool an cil i Arsenal nih an thah deng hna, 4-1 bak in an tei hna. Man U le Aston Villa an cil ve i Man U nih 3-1 in a thuat ve hna caah Man City hmunhma cu Arsenal nih a chuh i Arsenal hmunhma hlun cu Man U nih a hung lak than ve. 

Man City cu a pakhat nak Chelsea changtu ah a um leng mang nain tuzarh lawngah hin pa 4 nak ah a tlak deih hi a si. Hmaizarh bel hi Man City le Man U an ni thua te lai,a ho dah a tei lai ti chim chung a har ngai rih! 

Korea Nu Nih Pa A Tlai Hrem Caah A Bia An Ceih Lai: Kum 40 leng a si cang mi Korea nu pakhat nih nupi a ngei cia mi tlangval pakhat kha a inn ah a hruai i tlaihrem a timh, pa nih a duh lo caah palik sin a report i mah nu cu a bia ceih ding a si cang tiah The Korea Herald nih a thanh.

Korea ah hiti nu nih pa tlaihrem ruangah bia ceih ti bantuk a rak um bal rih lo, a tu a voikhat nak a si lai. Nu nih pa tlaihrem ruangah hin Korea upadi ningah cun kum thum tiang thawng thlak khawh ding a si. 


Kachin Sayama Pa 2 Thattu Theih Khawh Dawh An Si Cang: Kan hnu January thla ah Kachin sayama pa 2 cu an rak tlaihrem hna hnu ah an thah beh hna, a that tu hi tutiang fiang tein an thei kho rih lo. Nain, tuhi Kachin Baptist Convention nih an hlathlai i thil dik a chim kho tu ding minung kan hmuh cang hna an ti.

Mah mi thattu hlat hlai dingah cozah nih palik a rak fial hna nain zei hmanh an rak hmu kho lo caah Kachin khrifa pawl nih KBC hruainak in a tu hlathlai nak an tuah hi a si. Mah sayama te a that tu hi kawl ralkap an si lai tiin zumh bik a si. KBC bel nih cun fiang tein an chim duh rih lo. Irrawaddy