Thawngpang Bultan(April 2)

Chinram Cozah Budget Fehter Ding Hluttaw Meeting An Thu Cuah Mah: Chin Ramkulh Cozah caan hmaan a voi 10nk Hluttaw meeting an tuah liomi ah Chin Ramkulh Cozah 2015-2016 phaisa kum caah kyat nuai (billion) 92 an suaimi fehter ding in an ceih. 

Hi Hluttaw meeting cu March 30 in an thawk i ni nga chung an tuah lai. Meeting kai dingmi pakhat a bau i a dang an tling. Hi kyat nuai 92 hi centre cozah nih a pek mi a si i, Chinram cozah nih cun kyat nuai 180 hrawng pek ding an hal nain mah zat lawng an rak pek hna a si. 

Hi budget kum ah nuai 92 in tuan dingmi thanchonak rian biapi cu: lam, hlei, ti le mei, leikuang hna an si. Ngandamnak, fimcawnnak, khuate thanchonak pawl cu Central cozah nih direct in a thlak dingmi a si. Kyat nuai 92 cu $92 million leng a si lai. The Hakha Post

CCC College Cu CCU University Tiah Auh A Si Cang Lai: Chin Christian College (CCC) cu Chin Christian University (CCU) tiin thlen le thanchoter a si i, a ngeitu Chin Association for Christian Communication (CACC) a voi 9nk Tri-ennial meeting nih a fehter hnu ah April 4, chun 11:30 CCC campus ah CCU honnak an tuah cang lai tiah The Hakha Post nih a thanh.

College timi kha University ah an thlen si cun rumra a ngei deuh cang lai. Cachimhtu zong degree sang a ngah mi an tam deuh a herh ve hlei ah sianginn hman ding cauk le a dang thilri zong a tlamtlin deuh ngai  a hau ding a si. 

Thantlang Peng Tahtlang Khua Ti An Lak Piak Hna: Thantlang peng Khualhring tlang Tahtlang khua cu tlangbo chip ah a um caah ti an har ngaingai tawn i Alpha & Omega Company nih ti an lak piak hna i ti hmuh lunglawmhnak puai March 25 ah an tuah. 

Hi puai tuahnak ah Chin Ramkulh Cozah Vuanci Pu Van Thawng, Ramkulh Khuatelei Thanchonak Ramkulh lutlai changtu, District lutlai, Thantlang penguk bawi le zung lutlai upa minung 14 zong nih an telpi hna. Alpha & Omega Company nih hi ti laaknak ah tangka sing thongli le zanga an hman.The Hakha Post


Thantlang Christian Fellowship Committee Thar Thimnak An Tuah: 2015 Thantlang Christian Fellowship (TCF) Committee thar thimnak March 30 zing 7:00 ah Thantlang Baptist Church Hall ah an tuah. 

Thim tharmihna cu: Chairman- Pastor Ca Cung Bik (JMBC), Vice (1)- Pastor Biak Mang (UPC), Vice (2)- Rev.Tial Tin Sung (TBC), Secretary- Rev. Peng Thang (EFCM), Assistant- Rev. Uk Ling (CJC), Treasurer- Rev. Lian Or Sang (BCM), Assistant-Rev. Za Lian Thang (Methodist Church). Member hna cu: Pu Ram Khar, Pu Thawng Hnin (Khuanupa), Dr. Hmuh Thang, Pu. Lal Mawng Cung (MP), Rev. Hnok Lin, Pu Thla Hmung. A bawmtu hna cu: Pu Nun Thleng (No. 2 Khuabawi), Pu Siang Zel, Pu That Nawn (No.3 Khuabawi, Pu Hmung Kio (No. 1 Khuabawi). Hi hna hi TCF riantuantu thar thimmi hna an si tiah Hakha Post Reporter Henry Siang Bik Cung nih a chim. The Hakha Post