Thawngpang Bultan(April 1)

Yarmouk Camp

IS Ralhrang Pawl Syria Khualipi Damascus Refugee Camp An Lut Cang: Iraq le Syria ram ah Islamic State ser ding ah ral a tho cuahmah tu IS ralhrang pawl nih Syria khualipi Damascus um refugee camp pakhat a si mi Yarmouk ah an lut i cuka camp cu an control dih deng cang tiah BBC nih a thanh.

Mah camp ah hin Palestinian refugee 18,000 leng an um. Hika hmun a um mi Palestine mi ralkap le Syria cozah dohtu Free Syrian Army zong nih bia tak tein an doh ve hna nain an tei kho hna lo,tutiang hi an ni phomh cuahmah rih ko ti a si. Syria ram ral hi 2011 ah ai thawk i hi ral ruangah tu hi 200,000 leng an thi cang.

Rohingya An White Card An Chuh Than Cuahmah Hna: 2010 thimnak ah vote thlak khawh ding in kawl ralkap nih Rakhine ram um Rohingya pawl cu caan tawi te hman khawh ding mi White Card timi ID card te an rak tuah piak mi hna cu President nih hman khawh a si ti lo a ti caah tuni thawk in an chuh than cuahmah cang hna tiah RFA nih a thanh.

Tuan deuh ah khan Parliament nih White Card aa tlai mi zong 2008 constitution remh ding referendum tuah tikah vote pek khawh ve ding bia an rak chah nain kawl phungki le nationalist pawl nih an duh lo caah President nih rianrang in mah white card cu March 31 hnu ah chuh than ding ah order a rak chuah.  

Rakhine ram um Rohingya pawl hi kawl cozah nih citizenship a pek duh hna lo caah ram ngei lo(stateless) ah an cang. UN nuhrin covo riantuan tu nih cun mah Rohingya kong ah kawl cozah an mawtchiat ngai. 

US California State Ah Dum Ti Toih Khawh A Si Ti Lai Lo: US ram California state ah ti a har tuk ruangah ti an hman ning 25% zor ter ding in timh tuah a si i dum ti toih hna a ngah ti lai lo tiah Governor Jerry Brown nih a thanh. 

A bik in bawlung chuihnak certual, University campus le golf tuk nak hmunhma hna ah ti duh tawk in an hman mi khi zor ter deuh a si te lai. California state ah hin hiti nikhua a car ruangah lothlo pawl har nak a tong ngai ti a si. BBC


Iran Nuclear Kong I Chonhnak An Lim Kho Hoi Rih Lo: Iran nuclear hriam chiahter ding US le ramthawng pa 5 nih an chonh mi cu March 31 ah khan a tlangpi in hnatlaknak ngah ding an rak timh nain tuni zong an ni chonh rih i an lim hlei lo caah thaizing zong an ni chon rih lai tiah BBC nih a thanh. 

Iran Hi Zumh Tlak A Si Maw: Iran hi nuclear sernak ah a biapi ngai mi Uranium tam ngai a ngei cang. US nih cun mah Uranium hi nuclear sernak ah a hman sual lai ti a phang. Nain, Iran nih cun si-ai testnak le mei thazang(electricity) ah hman ka timh a ti ve. 

Nuclear sernak ding ah hin Uranium thazang 90% tiang thawn ter a hau. Si-ai test nak le meithazang caah cun 3-5% Uranium thazang lawng a herh mi a si. Nain, Iran nih Uranium thazang 20% tiang a thawn ter cang. Hiti a herhmi leng in Uranium thazang a thawn ter mi nih US lung a hrin ter i tutiang hnatlaknak an ngah khawh lo nak a si.BBC