30 March 2015

Thawngpang Bultan(March 29)


Pu Victor Biak Lian le Aung San Suu Kyi An Ni Tong: Tuzan lei Naypyidaw ah Aung San Suu Kyi cu KNU hruaitu le Pu Victor Biak Lian nih suimilam 2 chung an ton i tulio an kal pi cuahmah mi kahdaihnak kongah zeitindah NLD ai tel kho ve lai timi kong, 2008 constitution remhnak kong le tukum thimnak kong hna an ceih.

Hi tonnak he pehtlai in Pu Victor Biak Lian nih 'Dawh Suh hi a voikhat ka hmuh a si,kei mah pumpak ka hmuhning cu ka chim ti lai lo. Kan biaruah a hlunghlai ngai' tiah a facebook ah a tial. Hi hnu zongah i ton than lengmang ding ah hnatlaknak zong an ngei chih ti a si. 

Pu Victor Biak Lian hi CNA ah caan saupi nunthap in a rak cawlcang mi a si. A cauk'Ka Philh Kho Lo' timi zong a rel tu an tam,a rel zong a nuam. A tuhi kawlram daihnak kong ah a cawlcanghtu Euro-Burma Office(EBO) ah rian a tuan. 

Nika Vanlawng Mandalay in China Ah Ai Thawh Than Cang: Ni 10 chung Mandalay ah a cam hnu in nika thazang hmang in a zuang tu vanlawng Solar Impulse 2 cu China ram Chongqing khua ah va tum ding in ai thawh than cang, Chongqing le Mandalay kar hi 1,375 km ai hlat i suimilam 19 hrawng a rau te lai ti a si.

China ah tlawmpal a cam hnu ah US ram Hawaii ah a zuang than te lai, Hawaii lei a zuan tikah cun ninga le zaan nga chung rili cungah a zuang te lai. Cun, US ram Phoenix-New York hna ah ai din te lai i Europe pal pah in zuan hram ai thawknak Abu Dhabi a rak phan than te lai. BBC

Rakhine Hriamtlai Phu AA Le Kawl Ralkap An Ni Phomh Ve: Rakhine hriamtlai phu pakhat a si ve mi Arakan Army (AA) le kawl ralkap cu nizaan thawk in Chinram Paletwa he a naihnak Rakhine ram ah an ni phomh i cozah lei ralbawi pakhat le ral kap pakhat an thi tiah AA hruaitu pakhat nih RFA ah a chim.

Arakan Army hi Kokang hriamtlai phu MNDAA zong bia tak tein a bawmh tu an si. AA hi Col. Min Zan Wai hruainak in 2010 ah an rak dirhmi a si,hriam aa tlaimi ralkap thazang zeizah dah an ngei ti theih a si lo.

Lee Kuan Yew Ruak Thlah Cu A Ropui I Lung A Hmui Hrim Ko: Singapore ram a ceuter tu Lee Kuan Yew,91, ruak thlahnak cu tuni ah an tuah, a ruak hi 15km a sau mi lampi ah an kal pi i minung tingkhat leng nih ruahsur lak ah an mithli he an rak thlah ve. Vawleicung hruaitu tampi zong nih a ruak an rak thlah ve.  

Media kip nih an cahmai pakhatnak ah an tial dih, UK Newspaper lebang ah cun Lee Kuan Yew hmanthlak lawng hmuh khawh a si. Vawlei a hninh ko. Ruak thlah tu an mithli zoh ah lung a hno ngai. 

A nih hi mi lung hak ngai a si, cheukhat nih cun an soisel ngai ve. Prime Minister kum 31 chung a tuan ah zalong tein chimrel khawhnak(freedom of speech) a rak khamh ngai. Hikong ah New York Times nih interview an rak tuah i 'Thil ka rak tuah mi vialte cu a dik thlu ka ti lo,nain ka rak tuah mi thil vialte cu thatnak caah an si dih ko' a rak ti bal. 


Kan Rak Tih Ning Leng In Tih A Nung Deuh Chin Chin: Iran nuclear chiahter dingah US le ram thawng pa 5 hna nih Switzerland ah Iran an chonh cuahmah lio a si, a ni an khiah mi March 31 aa naih cang fawn caah mah hnatlaknak an ngah ding hi Israel nih a rak tih mi leng in tih a nung chin chin tiah Israel Prime Minister Netanyahu nih a zai hnawh hna tiah The Guardian nih a thanh. 

Thaizing kiptuh March 31 ah hin a hrampi in Iran nuclear chiahter nak kongah hnatlaknak ngah ding an si cang. Mah hnatlaknak nih Iran cu nuclear hriam sernak ah a biapi ngai mi Uranium ngeihter khawh dawh a si, mah Uranium ngeih hnu ah cun nuclear hriam ser a fawi ngai caah Israel nih a tih. Iran nih nuclear a ser khawh ah cun Israel map cu vawleicung map in a tlau kho mi a si. 

      

     

1 comment:

  1. Nikum Pu Solomon rat lio ah Victor Biak Lian cu CNA zong si lo, CNF zong si lo, CHRO hnmanh asi ti lo i amah pumpak pawmcawm nak ah avaak mi asi ati. CNF zong nih meeting ah kan sawm bal lo nain hung ka sawm ve uh tiah akan nawl tawn caah kan sawm mi tawn mi asi ati. Tutan zong hi Suu Kyi he ani ton asi lailo, midang group le Suu Kyi ani ton lio ah laithuam i hruk zokzok in ava peih i FB ah atar mi asi ko lai dah. Pumpak credit kawl mi le CNF kan pa le tak tak cu ani dang rumro ko. Na vun tial caah ka ni lawm.

    ReplyDelete